Sunday, 11 September 2016

ದೆವ್ವ ಅಂತೆ ದೆವ್ವ (poem)

ದೆವ್ವ ಅಂತೆ ದೆವ್ವ

ಹೋಗ್ರಿರೀ...ದೆವ್ವ ಅಂತೆ ದೆವ್ವ..!!
ನಾನ್ ಬದುಕಿ ನಾಲ್ಕ್ ದಶಕ ಕಳೆದ್ರೂ
ಯಾವ್ ಅಬ್ಬೆಪಾರಿ ದೆವ್ವನೂ ಬಂದು
ನನ್ನ ಯೋಗಕ್ಷೇಮ ಕೇಳ್ಲಿಲ್ಲ,

ಸಾವಿರಕ್ಕೊಬ್ಬ ಸತ್ತವನು ದೆವ್ವ ಅನ್ಕೊಂಡಿದ್ರೂ
ಯಾವ್ ಮೋಹಿನಿನೂ ತನ್ ರೂಪ ತೋರ್ಸಿಲ್ಲ
ಯಾವ್ ಬೇತಾಳನೂ ನನ್ನ ಬೆನ್ನಟ್ಟಲಿಲ್ಲ
ಪ್ರೇತದ ಪ್ರೀತಿಯಂತೂ ಸಿಕ್ಕೇ ಇಲ್ಲ.

ಸ್ಮಶಾನ,ಪಾಳು ಬಂಗಲೆಯನ್ನೂ ಸುತ್ತಿದೆ
ಮರದ ಸಂದಿಗೊಂದಿಯಲಿ ಕಣ್ಣಾಡಿಸಿದೆ
ಬೀದಿಯಲಿ ಅಮವಾಸ್ಯೆ ರಾತ್ರಿ ಕಳೆದೆ
ಯಾವ ದೆವ್ವವೂ ಗೋಚರಿಸಲಿಲ್ಲ...

ನಾ ಕಂಡದ್ದು  ಹಗಲಿನ ದೆವ್ವಗಳು
ಬಿಳಿ ಟೋಪಿ ಖಾದಿ ದಿರಿಸಿನ ಬೇತಾಳಗಳು
ಅಧಿಕಾರದಾಸೆಗೆ ರಕ್ತ ಹೀರುವ ಪ್ರೇತಗಳು
ಹಣಕ್ಕೆ ಬಾಯ್ ತೆರೆದ ಸತ್ತ ಹೆಣಗಳು....

ಸುಳ್ಳು ಬರವಸೆಗಳ ಕ್ರೂರ ರೂಪ
ಇದ್ದದ್ದು ಸೌಧದಲಿ ಬಂಗಲೆಯಲಿ
ಈ ಭಯಾನಕ ಕ್ರೂರ ಪಿಶಾಚಿಗಳ ನಡುವೆ
ಮಾನವೀಯ ದೆವ್ವಗಳು ಎಲ್ಲಿ ಕಂಡಾವು..?

ಹೋಗ್ರಿರಿ ದೆವ್ವ ಅಂತೆ ದೆವ್ವ.......!!!!!

                    -ಪ್ರಕಾಶ್. ಎನ್. ಜಿಂಗಾಡೆ

No comments:

Post a Comment