Friday, 18 August 2017

Ryan international school Yelahanka, Grade VII went trip to "Jaya agroo foods" a mushroom produxtion factory.

It was an educational trip where we learnt about the different types of Mushroom, the importance of mushroom.
India ranks 18th in the production of mushroom, with 2% of the total produce.
A report from WHO, tells us that every individual should consume about 56gms of mushroom per day as it is rich in vitamin D.
This trip had been, indeed, a informational one and I hope we all realise the hardwork of the farmers.

Ryan Inter House Grade V &  VIII carrom match were conducted on 18-8-2017 at Ryan Indoor hall, Yelahanka. Result:- Grade- VIII Boys 1.Adithya chikodi  (green) 2.Jonathan( yellow)3.Neelesh (green)  4. Yash (Yellow) Girls:- 1.Fathima (green) 2. Suganda (yellow) 3. Nithya Singh (blue) 4. Vanshika (red).

Grade-V Girls:- 1. Hansini(green).   2. Neha T (green) 3. Poorni mahaswari (green) 4. Amisha (red) Boys:- 1. Advik(red) 2. Md. Saaib(blue) 3. Avish A ( red) 4. Harshavardhan (green)

Ryan scouts and guides from yelahanka participated in the Activities conducted on the occasion of V P Deenadayalu Naidu's Birth centenary celebrations (1917 - 2017)  held on 2017 at state head quarters , shanthigruha ,#39, place road , Bengaluru - 560001

Thursday, 17 August 2017

ಅಂತ... ಆತಂಕ (ಭಾಗ-1)

ಅಂತ...ಆತಂಕ. (ಭಾಗ-1)

ಸೂರ್ಯನ ಹೊಂಗಿರಣ ಭೂಮಿಯನ್ನು ಸ್ಪರ್ಶಿಸಿಯಾಗಿತ್ತು. ಮುಂಜಾನೆಯ ತಂಗಾಳಿ ಕಿಟಕಿಯಿಂದ ಬೀಸಿ ಮೈಯನ್ನು ಸ್ಪರ್ಶಿಸುತ್ತಿದ್ದರೂ ತನುಗೆ ನಿದ್ದೆಯ ಮಂಪರು ಇನ್ನೂ ಇಳಿದಿರಲಿಲ್ಲ.

"ಏಯ್ ,  ತನು... ತನು...ಏಳೆ ಮೇಲೆ, ಸ್ವಲ್ಪ ಗಡಿಯಾರದ ಮುಳ್ಳು ನೋಡು. ಆಗಲೇ ಒಂಬತ್ತು ಗಂಟೆಯಾಗಿದೆ. ಎಷ್ಟು ಹೊತ್ತೆ ಮಲಗೋದು, ಹನ್ನೆರಡುಗಂಟೆಗೆ ಸರಿಯಾಗಿ ರೈಲು ನಿಲ್ದಾಣದಲ್ಲಿರಬೇಕು ಅಂತ ಗೊತ್ತು ತಾನೆ. ಏಳು ಬೇಗ ಎದ್ದು ಸ್ನಾನ ಮಾಡಿ ರೆಡಿಯಾಗು"

ಅಮ್ಮ ಸರೋಜ, ತನು ಹೊದ್ದ ಕಂಬಳಿ ಹಿಡಿದು ಎಳೆದಾಗಲೇ ತನುಗೆ ಎಚ್ಚರವಾಗಿದ್ದು

"ಏನಮ್ಮಾ ನೀನು....!!"

ಎನ್ನುತ್ತಲೇ ತನು ಮೈ ಮುರಿಯುತ್ತಾಲೇ ಎದ್ದಳು. ಇಪ್ಪತ್ತೊಂದು ವರುಷದ ತುಂಬು ಹರೆಯ ಅವಳದು. ಹಾಲಿನಂತ ಬಿಳುಪಾದ ಮೈ ಆಗತಾನೇ ಎದ್ದಿದ್ದರಿಂದ ಅರೆಬರೆ ಕಾಣುತ್ತಲಿತ್ತು. ಕೂದಲು ಕೆದರಿಕೊಂಡಿದ್ದರೂ ಸಹ ಮುಖವು ಸೌಂದರ್ಯದಿಂದ ಚಂದಿರನ ಕಳೆ ಕಟ್ಟಿಕೊಂಡಿತ್ತು. ಆದರೆ ನೈಟಿಯ ಬಟನ್ ಬಿಚ್ಚಿಕೊಂಡಿದ್ದನ್ನು ನೋಡಿ ಅಮ್ಮ ಸ್ವಲ್ಪ ಏರು ದನಿಯಲ್ಲಿಯೇ..

"ಛೀ.... ಎಳೇ ಮೇಲೆ, ಬಟ್ಟೆ ಮೇಲೂ ಜ್ಞಾನವಿಲ್ಲ ನಿನಗೆ, ಹೇಗೆ ಬಿದ್ಕೊಂಡಿದ್ದೀಯಾ ನೋಡು"

ಎಂದು ಅಮ್ಮ ಗದರಿಸಿದಳು. ತನು ತಾನುಟ್ಟ ಬಟ್ಟೆ ಸರಿಮಾಡಿಕೊಂಡು ತನು ಸ್ನಾನಕ್ಕೆ ಹೊರಟಳು...

ಎಲ್ಲರೂ ಸ್ನಾನ, ತಿಂಡಿ ಮುಗಿಸಿ ಸಿದ್ಧಾರಾಗುವಷ್ಟರಲ್ಲಿ ಗಡಿಯಾರದ ಮುಳ್ಳು ಹನ್ನೊಂದು ಗಂಟೆಗೆ ಬಂದಿತ್ತು.  ತನು, ಅವಳ ಅಮ್ಮ ಸರೋಜ ಮತ್ತು ಅಪ್ಪ ಚಂದ್ರಶೇಖರ್ ಬ್ಯಾಗ್ ಹಿಡಿದು ಮನೆಯಿಂದ ಹೊರಬಂದರು. ಆಟೋ ಹಿಡಿದು ಅಲ್ಲಿಂದ ಅಲ್ಲಿಂದ ನೇರವಾಗಿ ರೈಲು ನಿಲ್ದಾಣಕ್ಕೆ ಹೊರಟರು. ರೈಲು ನಿಲ್ದಾಣದಲ್ಲಿ ಜನ ಜಂಗುಳಿ ಸ್ವಲ್ಪ ಜಾಸ್ತಿಯೇ ಇತ್ತು. ಟಿಕೇಟ್ ಆಗಲೇ ಬುಕ್ ಮಾಡಿದ್ದರಿಂದ ಸೀದ ಮೂರನೇ ಪ್ಲಾಟ್ ಫಾರಂ ಗೆ ಹೊರಟರು...

"ಅಪ್ಪಾ... ಸ್ವಲ್ಪ ಹಿಂದೆ ನೋಡು ನಮ್ಮನ್ನು ಆ ಹುಡುಗ ಫಾಲೋ ಮಾಡ್ತಾ ಇದಾನೆ... ನಾವು ಆಟೋದಿಂದ ಇಳಿದಾಗಿನಿಂದಲೂ ನನ್ನನ್ನೇ ಗುರಾಯಿಸಿ ನೋಡುತ್ತಲೇ ಇದ್ದ , ಈಗಲೂ ಹಿಂದೆ ಹಿಂದೆನೇ ಬರುತ್ತಿದ್ದಾನೆ..."

ತನು ಅಪ್ಪನಿಗೆ ಮೆದು ಧ್ವನಿಯಲ್ಲಿಯೇ ಹೇಳಿದಳು,
ಅಪ್ಪ ಚಂದ್ರ ಶೇಖರ್ ಹಿಂದಕ್ಕೆ ತಿರುಗಿ ನೋಡಿದರು. ಮಗಳು ತನು ಹೇಳಿದಂತೆಯೇ ಆ ಹುಡುಗ ಹಿಂದೆ ಹಿಂದೆನೇ ಬರುತ್ತಿದ್ದ. ನೋಡಲು ಸುಂದರವಾಗಿದ್ದ. ಸುಮಾರು ಇಪ್ಪತ್ತೈದು ವರ್ಷದ ಯುವಕ. ಜೀನ್ಸ್ ಪ್ಯಾಂಟಿಗೆ ಬಿಳಿಯ ಟೀ ಷರ್ಟ್ ಹಾಕಿಕೊಂಡಿದ್ದ. ತಲೆಗೂದಲು ಉದ್ದವಾಗಿಯೇ ಇತ್ತು. ಚಿಗುರು ಮೀಸೆಯ ಆ ಯುವಕ ನೋಡಲು ಜೆಂಟಲ್ ಮೆನ್ ನಂತೆ ಕಾಣುತ್ತಿದ್ದ.

"ಯಾರೋ ಬಿಡಮ್ಮ,...  ಸುಂದರ ಹುಡುಗಿಯರನ್ನು ಕಂಡ ಕೂಡಲೇ ಈಗಿನ ಹುಡುಗರು ಫಾಲೋ ಮಾಡ್ತಾ ಬಂದು ಬಿಡುತ್ತಾರೆ, ನೀನೇನೂ ಹೆದರಬೇಡ ನಡಿ ಬೇಗ ಬೇಗ..."

ಅಪ್ಪ ಮಗಳಿಗೆ ಧೈರ್ಯ ತುಂಬಿದರು.

ರೈಲು ಸರಿಯಾಗಿ ಹನ್ನೆರಡುಗಂಟೆಗೆ ಹೊರಟಿತು...

ರೈಲು ವೇಗವಾಗಿ ಸಾಗಲಾರಂಬಿಸಿತು. ಅದೇ ಯುವಕ ತನು ಕುಳಿತ್ತಿದ್ದ ಸೀಟಿನ ಎದುರುಗಡೆಯೇ ನೇರವಾಗಿಯೇ ಕುಳಿತುಕೊಂಡಿದ್ದ. ಆಗಾಗ ತನುಳನ್ನು ನೋಡುತ್ತಾ ಕಣ್ಣು ತಂಪು ಮಾಡಿಕೊಳ್ಳುತ್ತಿದ್ದ. ಆದರೆ ತನುವಿಗೆ ಮಾತ್ರ ಹುಡುಗನ ಆ ನೋಟ ಹಿಡಿಸುತ್ತಿರಲಿಲ್ಲ. ಕೊನೆಗೆ ಎದುರುಗಡೆಯ ಸೀಟಿಗೆ ಹೋಗಿ ಕುಳಿತಳು...

ರೈಲು ಅರಸಿಕೆರೆಯನ್ನು ತಲುಪಿತು. ತನು ಬ್ರೇಕ್ ಫಾಸ್ಟ್ ಗಾಗಿ ಅಪ್ಪನಿಂದ ದುಡ್ಡು ಪಡೆದು ಕೆಳಗೆ ಇಳಿದಳು. ಬಿಸಿ ಬಿಸಿಯಾದ ಇಡ್ಲಿಯ ಜೊತೆಗೆ ಉದ್ದಿನ ವಡೆಯನ್ನು ಜೊನ್ನೆಯಲ್ಲಿ ಹಾಕಿ ಕೊಡುತ್ತಿದ್ದ. ತನು ಕೈಯಲ್ಲಿ ದುಡ್ಡನ್ನು ಕೊಡುತ್ತಾ ಎರಡು ಪ್ಲೇಟ್ ಕೊಡಿ ಎಂದು ಕೈಯನ್ನು ಮುಂದೆ ಚಾಚಿದಳು. ದುಡ್ಡು ಹಿಡಿದ ಕೈಯನ್ನು ಯಾರೋ ಹಿಡಿದಂತಾಯಿತು. ತಿರುಗಿ ನೋಡಿದರೆ ಅದೇ ಹುಡುಗ, ರೈಲು ನಿಲ್ದಾಣದಿಂದಲೂ ಬಿಂಬಾಲಿಸಿಕೊಂಡು ಬರುತ್ತಿದ್ದವನು. ತನ್ನ ಕೈ ಹಿಡಿದ ಆ ಯುವಕನನ್ನು ನೋಡಿ ತನು ಆಶ್ಚರ್ಯಗೊಂಡಳು.

'ಬಿಡೋ.. ಕೈ"

ಎನ್ನುತ್ತಾ ತನು ಕೈ ಬಿಡಿಸಿಕೊಂಡಳು.

"ಪ್ಲೀಸ್... ತನು,.... ತನಿಷ್ಕ ಪ್ಲೀಸ್... ನನ್ನ ಮಾತು ಕೇಳು, ಬರೀ ಒಂದೆರಡು ನಿಮಿಶ ಅಷ್ಟೆ..ನನ್ನ ಮಾತು ಕೇಳು"

ಆ ಯುವಕ ಹಾಗೆ ಹೇಳುತ್ತಿದ್ದಂತೆ. ತನು ಅವನಿಂದ ತಪ್ಪಿಸಿಕೊಂಡು ಓಡಿದಳು. ಆ ಯುವಕ ಬಿಡಲಿಲ್ಲ ಆಕೆಯನ್ನು ಹಿಂಬಾಲಿಸಿಕೊಂಡೇ ಓಡಿದ. ಜೀನ್ಸ್ ಪ್ಯಾಂಟ್ ಜೊತೆಗೆ ಪಿಂಕ್ ಟಾಪ್ ಧರಿಸಿದ ತನಿಷ್ಕ ಜಿಂಕೆಯಂತೆ ಓಡುತ್ತಿದ್ದಳು. ಅವಳ ಹಿಂದೆ ಯುವಕನು ಸಹ...

"ಪ್ಲೀಸ್ ತನಿಷ್ಕ.... ನಿಂತ್ಕೊ...."

ಎನ್ನುತ್ತಲೇ ಹಿಂದೆ ಓಡುತ್ತಿದ್ದ.
ನಿಲ್ದಾಣದಲ್ಲಿ ಎಲ್ಲರ ಕಣ್ಣಗಳು ಇವರತ್ತವೇ ತಿರುಗಿದವು. ಏನೋ ನಡೆಯುತ್ತಿದೆ ಎನ್ನುವಂತೆ ಜನರೆಲ್ಲಾ ನಿಂತು ನೋಡುತ್ತಿದ್ದರು. ಕೂಡಲೇ ಆ ಯುವಕನನ್ನು ಹಿಂದಿನಿಂದ ಯಾರೋ ಹಿಡಿದು ನಿಲ್ಲಿಸಿದರು. ದಪ್ಪ ಮೀಸೆಯನ್ನು ಬಿಟ್ಟುಕೊಂಡಿದ್ದ ರೈಲ್ವೇ ಪೋಲೀಸ್ ಒಬ್ಬ ಬಿಟ್ಟುಕೊಂಡು ಆ ಯುವಕನನ್ನು ಹಿಡಿದುಕೊಂಡು..

"ಏನೋ... ಕತ್ತೆ ಬಡವ, ಹುಡುಗಿಯನ್ನು ಚುಡಾಯಿಸ್ತಿಯಾ...? ನಡಿಯೋ ಸ್ಟೇಷನ್ನಿಗೆ"

ಎನ್ನುತ್ತಾ ಕೈ ಯಲ್ಲಿರುವ ಲಾಟಿಯಿಂದ ಆ ಯುವಕನ ಮುಕುಳಿಯ ಮೇಲೆ ಒಂದು ಏಟನ್ನು ಸರಿಯಾಗಿಯೇ ಬಿಟ್ಟ

"ಸರ್ ಸುಮ್ಮನಿರಿ ಸರ್... ನಾನೇನು ಅಂತವನಲ್ಲ, ತನಿಷ್ಕ ಪ್ಲೀಸ್ ನೀನಾದ್ರೂ ಹೇಳು.... ಪ್ಲೀಸ್ ತನಿಷ್ಕ... ಪ್ಲೀಸ್...."

ಆ ಯುವಕ ಅಲ್ಲಿಂದಲೇ ಕೂಗಿಕೊಂಡ. ಆದರೂ ಆ ಮೀಸೆ ಮಾಮಾ ಅಲ್ಲೇ ಇರುವ ಸ್ಟೇಷನ್ ಒಳಗೆ ಕರೆದುಕೊಂಡು ಹೋದ.  ತನಿಷ್ಕ ಸಹ ಹಿಂದೆಯೇ ಬಂದಳು  ಆ ಯುವಕನನ್ನು ಹಿಡಿದು ಕೂರಿಸಿದ ಸ್ಥಳಕ್ಕೆ ಬಂದು ನಿಂತಳು. ದಪ್ಪ ಮೀಸೆಯ ಆ ಪೋಲಿಸಪ್ಪ ತನಿಷ್ಕಳನ್ನು ಕೆಕ್ಕರಿಸಿ ನೋಡಿದ. ಒಮ್ಮೆ ಹುಡುಗನ ಕಡೆಗೆ ಕೋಪದಿಂದ ನೋಡಿ ಮತ್ತೆ ಹುಡುಗಿಯ ಕಡೆಗೆ ಕೆಕ್ಕರಿಸಿ ನೋಡಿದ...

"ಸರ್  .ಪ್ಲೀಸ್ ಬಿಟ್ಟು ಬಿಡಿ  ಆ ಹುಡುಗ ಅಂತವನಲ್ಲ. ನನಗೆ ಪರಿಚಯದವನೆ. ಹೆಸರು ರೋಹನ್ ಅಂತ, ಅವನೇನು ನನ್ನ ಚುಡಾಯಿಸುತ್ತಿರಲಿಲ್ಲ. ಒಳ್ಳೆ ಹುಡುಗ"

ತನಿಷ್ಕ ಕೈ ಮುಗಿದು ಪೋಲೀಸನವನಿಗೆ ಬೇಡಿಕೊಂಡಳು...

"ಪಬ್ಲಿಕ್ ಪ್ಲೇಸಲ್ಲಿ ಸ್ವಲ್ಪ ಸರಿಯಾಗಿ ಬಿಹೇವ್ ಮಾಡೋದನ್ನ ಕಲೀರಿ... ನೋಡಿದವರು ಏನಂತ ತಿಳ್ಕೊತಾರೆ.. ಬುದ್ಧಿ ಇಲ್ವಾ ನಿಮಗೆ, ಸರಿ ಹೋಗಿ..."

ಪೋಲೀಸಪ್ಪ ಹಾಗೆ ಹೇಳಿ ಮುಗಿಸುವಷ್ಟರಲ್ಲಿಯೇ ರೈಲು ಮುಂದೆ ಹೊರಡಲು ಸೀಟಿ ಹಾಕಲಾರಂಭಿಸಿತು. ತನಿಷ್ಕ ತಕ್ಷಣ ರೈಲಿನ ಕಡೆಗೆ  ಓಡಿದಳು. ಅವಳ ಹಿಂದೆ ರೋಹನ್ ಸಹ ಓಡಿದನು...

"ಯಾಕಮ್ಮಾ... ಇಡ್ಲಿ ತರ್ತೀನಿ ಅಂತ ಹೋದವಳು ಬರೀ ಕೈಲಿ ಬಂದಿದ್ದೀಯಾ...?"

ಅಮ್ಮ ಸರೋಜ ಮಗಳು ಬರಿ ಗೈಲಿ ಹಿಂದಿರುಗಿ ಬಂದಿದ್ದನ್ನು ನೋಡಿ ಕೇಳಿದಳು

"ಏನಿಲ್ಲಮ್ಮ... ಜನ ಎಲ್ಲಾ ಇಡ್ಲಿಯವನಿಗೆ ಮುಗಿ ಬಿದ್ದಿದ್ದರು.. ನನಗೆ ಕೊಡುವಷ್ಟರಲ್ಲಿ ಎಲ್ಲಾ ಖಾಲಿಯಾಯಿತು.... ಇಲ್ಲೆ ರೈಲ್ವೇ ಕ್ಯಾಟರರ್ ತಂದಿದ್ದನ್ನೇ ತಿನ್ನೋಣ ಬಿಡಮ್ಮ..."

ತನಿಷ್ಕ ಅಮ್ಮನಿಗೆ ಸಮಜಾಯಿಸಿ ಹೇಳಿದಳು...

ಅಷ್ಟರಲ್ಲಿ ರೈಲು ತನ್ನ ವೇಗವನ್ನು ಹೆಚ್ಚಿಸಿಕೊಂಡು ಮುಂದೆ ಮುಂದೆ ಸಾಗುತ್ತಿತ್ತು.

ಮತ್ತೆ ಆ ಯುವಕ... ರೋಹನ್ ತನು ಕುಳಿತ್ತಿದ್ದ ಎದುರುಗಡೆಯ ಸೀಟಿನಲ್ಲೇ ಕುಳಿತನು. ತನು ಅವನ ಎದುರಾಗಿ ಕುಳಿತುಕೊಳ್ಳಲು ಮನಸ್ಸು ಬಾರದೇ ತನ್ನ ಸ್ಥಳವನ್ನು ಮತ್ತೆ ಬದಲಿಸಿ ಕುಳಿತಳು.

ದಾವಣಗೆರೆ ಬರುವಷ್ಟರಲ್ಲಿ ರೈಲಿನಲ್ಲಿ ಶೇಕಡ ತೊಂಬತ್ತರಷ್ಟು ಜನ ಖಾಲಿಯಾಯಿತು. ಬೆಂಗಳೂರಿನಿಂದ ಹತ್ತಿದ ಎಲ್ಲಾ ಜನರು ದಾವಣಗೆರೆಯಲ್ಲೇ ಇಳಿದರು. ಇನ್ನು ಬೋಗಿಯಲ್ಲಿ ಇದ್ದದ್ದು ಸೀಟಿಗೊಬ್ಬ ಪ್ರಯಾಣಿಕರು. ಅಲ್ಲಲ್ಲಿ ಖಾಲಿ ಖಾಲಿ ಸೀಟುಗಳು. ದಾವಣಗೆರೆಯಲ್ಲಿ ಹತ್ತಿದ ಕಪ್ಪು ಕೋಟು ಧರಿಸಿದ ಮಧ್ಯ ವಯಸ್ಸಿನ ವ್ಯಕ್ತಿಯೊಬ್ಬ ಸೂಟ್ ಕೇಸ್ ಹಿಡಿದು ತನಿಷ್ಕ ಕುಳಿತ್ತಿದ್ದ ಎದುರುಗಡೆ ಬಂದು ಕುಳಿತನು. ನೋಡಲು ಕಟ್ಟು ಮಸ್ತಾದ ಶರೀರವಿತ್ತು. ತನ್ನ ಫ್ರೆಂಚ್ ದಾಡಿಯನ್ನು ಆಗಾಗ ಕೆರೆದುಕೊಳ್ಳುತ್ತಾ ಓರೇ ನೋಟದಿಂದ ತನಿಷ್ಕಳ ಕಡೆಗೆ ಆಗಾಗ ನೋಡುತ್ತಿದ್ದ. ಒಮ್ಮೆ ಹಿಂದೆ ಮತ್ತೊಮ್ಮೆ ಮುಂದೆ ಯಾರನ್ನೋ ನೋಡುವಂತೆ, ಯಾರನ್ನೋ ಹುಡುಕುವಂತೆ  ಅನುಮಾನಕರವಾದ ದೃಷ್ಠಿಯನ್ನು ಬೀರುತ್ತಾ ನೋಡುತ್ತಿದ್ದನು. ಸ್ವಲ್ಪ ಹೊತ್ತಿನಲ್ಲಿ ರೈಲು ಹರಿಹರ ನಿಲ್ದಾಣವನ್ನು ತಲುಪಿತು...

ಇದ್ದ ಬದ್ದ ಅಲ್ಪ ಸ್ವಲ್ಪ ಜನರು ಹರಿಹರದಲ್ಲಿ ಇಳಿದುಕೊಂಡರು. ಇಡೀ ಬೋಗಿಯಲ್ಲಿ ಇದ್ದದ್ದು. ತನಿಷ್ಕಳ ಕುಟುಂಬ, ಸ್ವಲ್ಪ ದೂರದಲ್ಲಿ ರೋಹನ್ ಮತ್ತು ಆ ಫ್ರೆಂಚ್ ದಾಡಿಯ ವ್ಯಕ್ತಿ ಮಾತ್ರ.
ಕಿಟಕಿಯಿಂದ ಬೇಲ್ ಪುರಿಯನ್ನು ಖರೀಧಿಸಿದ ತನಿಷ್ಕ ನಿಧಾನವಾಗಿ ಸ್ವಲ್ಪ ಸ್ವಲ್ಪವೇ ತಿನ್ನತೊಡಗಿದಳು. ರೈಲು ನಿಧಾನವಾಗಿ ಮತ್ತೆ ಚಲಿಸಲಾರಂಭಿಸಿತು. ರೈಲು ಇನ್ನು ಸ್ವಲ್ಪ ದೂರವೂ ಚಲಿಸಿರಲಿಲ್ಲ. ಆ ಫ್ರೆಂಚ್ ದಾಡಿಯ ಅನಾಮಿಕ ವ್ಯಕ್ತಿ ಎದ್ದು ಬಂದು ಸೀದಾ ಚಂದ್ರ ಶೇಖರ್ ಮತ್ತು ತನಿಷ್ಕ ಕುಳಿತ್ತಿದ್ದ ಎದುರು ಗಡೆಯ ಸೀಟಿನ ಮುಂದೆ ಕುಳಿತನು. ಒಂದು ಕ್ಷಣ ಚಂದ್ರ ಶೇಖರ ರವರಿಗೆ ಆಶ್ಚರ್ಯವಾಯಿತು. ಇಷ್ಟೊಂದು ಖಾಲಿ ಸೀಟು ಇದ್ದರೂ ಸಹ ಈ ವ್ಯಕ್ತಿ ಇಲ್ಲ್ಯಾಕೆ ಬಂದು ಕುಳಿತ್ತಿದ್ದಾನೆ. ನೋಡಲು ಕ್ರಿಮಿನಲ್ ತರ ಕಾಣ್ತಾ ಇದ್ದಾನೆ ಎಂದು ಯೋಚಿಸ ತೊಡಗಿದರು ಆದರೆ ಏನೂ ಮಾಡುವಂತಿರಲಿಲ್ಲ. ಪ್ರಯಾಣಿಕರಿಗೆ ಅಲ್ಲಿ ಕುಳಿತು ಕೊಳ್ಳಿ, ಇಲ್ಲಿ ಕುಳಿತುಕೊಳ್ಳಿ ಎಂದು ನಿರ್ದೇಶನ ನೀಡಲು ಸಾಧ್ಯವೂ ಇರಲಿಲ್ಲ. ಒಂದು ವೇಳೆ ಆ ವ್ಯಕ್ತಿಯೇನಾದರೂ ಕೆಟ್ಟವನು ಎಂದೆನಿಸಿದರೆ ನಾವೇ ಸೀಟು ಬದಲಾಯಿಸಿದರಾಯಿತು ಎಂದು ಯೋಚಿಸಿ ಚಂದ್ರ ಶೇಖರ್ ರವರು ಸುಮ್ಮನಾದರು...

ರೈಲು ವೇಗವಾಗಿ ಚಲಿಸತೊಡಗಿತು. ತನಿಷ್ಕ ಹಿಡಿದಿದ್ದ ಬೇಲ್ ಪುರಿಯ ಪೊಟ್ಟಣವೂ ಖಾಲಿಯಾಗತೊಡಗಿತು. ಖಾಲಿ ಪೊಟ್ಟಣವನ್ನು ಕಿಟಕಿಯಾಚೆಗೆ ಎಸೆದು ನೀರು ಕುಡಿದು ಮತ್ತೆ ತನ್ನ ದೃಷ್ಟಿಯನ್ನು ಕಿಟಕಿಯಾಚೆ ನೆಟ್ಟು ಪ್ರಕೃತಿ ಸೌಂದರ್ಯವನ್ನು ಸವಿಯುತ್ತಾ ಕುಳಿತಳು. ಆಕೆಯ ಮುಂಗುರುಳುಗಳು ಬೀಸುತ್ತಿರುವ ಗಾಳಿಯೊಂದಿಗೆ ಸರಸವಾಡುತ್ತಾ ಹಾರಾಡುತ್ತಿದ್ದವು. ಬಿಳಿಯ ಕೆನ್ನೆಗಳು ರೇಷಿಮೆಯ ಹೊಳಪನ್ನು ಧರಿಸಿದ್ದವು. ಕಣ್ಣುಗಳು ಮೀನಿನ ಆಕಾರವನ್ನು ಪಡೆದು ಕಾಡಿಗೆಯಿಂದ ಶೃಂಗಾರಗೊಂಡಿತ್ತು. ತನಿಷ್ಕ ನಿಜವಾಗಿಯೂ ಸೌಂದರ್ಯದಲ್ಲಿ ಅಪ್ಸರೆ...

ರೈಲು ಈಗ ಮತ್ತಷ್ಟು ವೇಗದಿಂದ ಸಾಗಲಾರಂಭಿಸಿತು. ಎದುರುಗಡೆಯ ಕುಳಿತ್ತಿದ್ದ ಫ್ರೆಂಚ್ ದಾಡಿಯ ಅನಾಮಿಕ ವ್ಯಕ್ತಿ ನಿಧಾನವಾಗಿ ಸೂಟ್ ಕೇಸನ್ನು ತೆಗೆದನು. ಒಳಗೆ ಎರಡು ಆಧುನಿಕ ಪಿಸ್ತೂಲ್ ಗಳಿದ್ದವು. ರೈಲಿನ ವೇಗಕ್ಕೆ ನಿದ್ದೆಯ ಮಂಪರಿನಲ್ಲಿದ್ದ ಚಂದ್ರಶೇಖರ್ ರವರಿಗಾಗಲಿ. ಸರೋಜಳಿಗಾಗಲಿ ಎದುರುಗಡೆ ಕುಳಿತ್ತಿದ್ದ ವ್ಯಕ್ತಿಯ ಯಾವ ಚಟುವಟಿಕೆಗಳಾಗಲಿ ಗಮನಕ್ಕೆ ಬಾರದಾಯಿತು. ಇನ್ನು ತನಿಷ್ಕಳ ದೃಷ್ಟಿ ಕಿಟಕಿಯಾಚೆಯಿದ್ದುದರಿಂದ ಆ ವ್ಯಕ್ಕಿ ರಿವಾಲ್ವರ್ ನ್ನು ಸೂಟ್ ಕೇಸನಿಂದ ಹೊರ ತೆಗೆದರೂ ಅದು ಅವಳ ಗಮನಕ್ಕೂ ಬಾರದೇ ಹೋಯಿತು. ಕೈಯಲ್ಲಿ ರಿವಾಲ್ವರ್ ಹಿಡಿದು ಮೇಲೆದ್ದ ಆ ವ್ಯಕ್ತಿ ನೇರವಾಗಿ ತನಿಷ್ಕಳ ಹಣೆಗೆ ಗುರಿಯಿಟ್ಟನು. ಎಲ್ಲೋ ದೃಷ್ಟಿ ನೆಟ್ಟಿದ್ದ ತನಿಷ್ಕಳ ಹಣೆಗೆ ರಿವಾಲ್ವರ್ ನ ತುದಿ ಆಕೆಯ ಹಣೆಯನ್ನು ಸ್ಪರ್ಶಿಸಿದಾಗಲೇ ಅವಳಿಗೆ ಗೊತ್ತಾಗಿದ್ದು ಎದುರುಗಡೆಯ ವ್ಯಕ್ತಿ ತನ್ನ ಹಣೆಗೆ ರಿವಾಲ್ವರ್ ನಿಂದ ಗುರಿ ಇಟ್ಟಿದ್ದಾನೆಂದು. ಕೂಡಲೇ ಬೆದರಿ ಕೂಗಿದಳು. ನಿದ್ದೆಯ ಮಂಪರಿನಿಂದ ಎದ್ದ ಚಂದ್ರ ಶೇಖರ್ ಮತ್ತು ಸರೋಜ ಹೆದರಿದರು...

"ಯಾರೋ ನೀನು.... ಯಾರೋ, ಬಿಡೋ ನನ್ನ ಮಗಳನ್ನು...."

ಎಂದು ಕೂಗುತ್ತ ಚಂದ್ರಶೇಖರ್ ಆ ಅನಾಮಿಕ ವ್ಯಕ್ತಿ ಮೇಲೆರಗಿದನು. ಕೂಡಲೇ ಆ ವ್ಯಕ್ತಿ ಕೋಪದಿಂದ ಒಂದೇ ಒಂದು ಏಟನ್ನು ಚಂದ್ರ ಶೇಖರ್ ಗೆ ಹೊಡೆದನು. ಹೊಡೆದ ರಭಸಕ್ಕೆ ಚಂದ್ರ ಶೇಖರ್ ಕೆಳಗೆ ಬಿದ್ದರು. ಬಾಯಿಂದ ರಕ್ತ ಸುರಿಯಲಾರಂಬಿಸಿತು. ಇದನ್ನೆಲ್ಲಾ ನೋಡಲಾರದೆ ಸರೋಜ ಮೂರ್ಛೆ ಹೋಗಿ ಸೀಟಿನ ಮೇಲೆ ಧಡ್ ಅಂತ ಬಿದ್ದಳು. ತನಿಷ್ಕಳ ಹಣೆಯಿಂದ ಬೆವರು ಇಳಿಯಲಾರಂಬಿಸಿತು. ರೈಲು ಮಾತ್ರ  "ಧಡ್ ಧಡಕ್...ಧಡ್ ಧಡಕ್...." ಎಂದು ಸದ್ದು ಮಾಡುತ್ತಾ ಮುಂದೆ ವೇಗವಾಗಿ ಸಾಗುತ್ತಲೇ ಇತ್ತು....

        (ಮುಂದು ವರೆಯುವುದು)

Tuesday, 8 August 2017

ಪರಿಚಯ

ಹೆಸರು :-   ಪ್ರಕಾಶ್ ಎನ್. (ಪ್ರಕಾಶ್ ಎನ್ ಜಿಂಗಾಡೆ)

ಹುಟ್ಟಿದ ಸ್ಥಳ :- ದಾವಣಗೆರೆ ಜಿಲ್ಲೆಯ ಬಸವಾಪಟ್ಟಣ

ನೆಲೆ:- ಯಶವಂತಪುರ, ಬೆಂಗಳೂರು.

ವಿದ್ಯಭ್ಯಾಸ :-  ಎಂ. ಎ ,  ಬಿ.ಇಡಿ. ಹಿಂದಿ ರತ್ನ ( ಮೈಸೂರ್ ಹಿಂದಿ ಪ್ರಚಾರ್ ಪರಿಷತ್)

ವೃತ್ತಿ :- ಪ್ರೌಢ ಶಾಲಾ ಶಿಕ್ಷಕನಾಗಿ ಹದಿಮೂರು ವರ್ಷಗಳ ಸೇವೆ. ಪ್ರಸ್ತುತ ರಾಯನ್ ಇಂಟರ್ ನ್ಯಾಷನಲ್ ಸ್ಕೂಲ್ ಯಲಹಂಕ, ಬೆಂಗಳೂರಿನಲ್ಲಿ ಶಿಕ್ಷಕನಾಗಿ ಸೇವೆ ಸಲ್ಲಿಸುತ್ತಿದ್ದೆನೆ.

ಹವ್ಯಾಸ :- ಕನ್ನಡದಲ್ಲಿ ಕತೆ, ಕವನ, ಲಲಿತ ಪ್ರಭಂದ, ಇತ್ಯಾದಿ ಪ್ರಕಾರಗಳಲ್ಲಿ ಬರವಣಿಗೆ, ಪುಸ್ತಕ ಓದು, ಹಾಡು ಸಂಗೀತಗಳನ್ನು ಕೇಳುವುದು, ...ಇತ್ಯಾದಿ.

ಕೃತಿ :-  ಶಿಕ್ಷಕರ ಜೊತೆಗೆ (2008- ವಿಕ್ರಮ್ ಪ್ರಕಾಶನ)
ಈ ಪುಸ್ತಕ 2008 ರಲ್ಲಿ ಪ್ರಕಟವಾಗಿದ್ದು, ಕರ್ನಾಟಕ ಸರಕಾರದ ಶಿಕ್ಷಣ ಇಲಾಖೆಯು ಈ ಪುಸ್ತಕವನ್ನು ಕರ್ನಾಟಕದಲ್ಲಿರುವ ಎಲ್ಲಾ ಶಾಲೆಗಳ ಗ್ರಂಥಾಲಯಕ್ಕೆ ಖರೀಧಿಸಿದ್ದು ಈ ಪುಸ್ತಕದ ಮತ್ತೊಂದು ಹೆಗ್ಗಳಿಕೆಯಾಗಿದೆ.
        ನಮ್ಮ ದಿನಾಚರಣೆಗಳು (2014- ಪ್ರತಿಭಾ ಪ್ರಕಾಶನ) ಈ ಪುಸ್ತಕವು ಕನ್ನಡದ ಚಂದನ ಟಿ.ವಿ. ವಾಹಿನಿಯ "ಥಟ್ ಅಂತ ಹೇಳಿ" ಕಾರ್ಯಕ್ರಮದಲ್ಲಿ ಹಲವು ತಿಂಗಳವರೆಗೆ ವಿಜೇತರಿಗೆ ಬಹುಮಾನವಾಗಿ ನೀಡಲಾಗುತ್ತಿದ್ದು ಇದು ಪುಸ್ತಕದ ಜನಪ್ರಿಯತೆಗೆ ಸಾಕ್ಷಿಯಾಗಿದೆ.

3) ಸುಭಾಷ್ ಮಾರ್ಗದರ್ಶಿ  (2013- ಸುಭಾಷ್ ಪಬ್ಲಿಕೇಶನ್)
4) ಸಾಹಿತ್ಯ ಸಂಚಲನ ಐ,ಸಿ,ಎಸ್,ಇ ಮಾರ್ಗದರ್ಶಿ (2014)
5) ಕನ್ನಡ ಕಸ್ತೂರಿ 10 ಮಾರ್ಗದರ್ಶಿ (ಸುಭಾಷ್ ಪಬ್ಲಿಕೇಶನ್)

ವಿದ್ಯಾರ್ಥಿ ಗಳಿಗಾಗಿ ರಚಿತವಾದ ಆರು ಕೈಪಿಡಿಗಳು. ಬಿ,ಕಾಂ, ಮತ್ತು ಬಿ,ಎ, ವಿದ್ಯಾರ್ಥಿಗಳಿಗಾಗಿ ಮತ್ತು ಇನ್ನಿತರೆ ಪುಸ್ತಕಗಳು...

ಇನ್ನು ಪ್ರಕಟಣೆಗೆ ಸಿದ್ಧವಾಗಿರವ ರಚನೆಗಳೆಂದರೆ..

ಕತೆಗಳು:-
1). ಈಡಿಯಟ್ (2012 ರಲ್ಲಿ ಕರ್ಮವೀರದಲ್ಲಿ ಪ್ರಕಟ)
2) ಕಡಲ ಕಿನಾರೆಯ ಹುಡುಗಿ
3) ಮುಸುಕು
4) ಕುಡುಕ 
5) ಸೆಲ್ಫಿ 
6) ಭೂತ ಬಂಗಲೆ (ಕಿರು ಚಲನ ಚಿತ್ರಕ್ಕೆ ಆಯ್ಕೆಯಾದ ಕತೆ... ಶೀಫ್ರದಲ್ಲೇ ಚಿತ್ರೀಕರಣ)
7) ಕೆಪ್ಪನ ಕತೆ 
8) ಒಲವಿನ ಬಣ್ಣ 
9) ಐಸ್ ಕ್ರೀಮ್ 
10) ಮುರ್ಗಿ ಕೆ ಅಂಡೆ 
11) ಗುಬ್ಬಚ್ಚಿಗಳು 
12) ಸುಂದರಿ 
13) ದೇವರು ಧರ್ಮ 
14) ಚಿತ್ರ ಮಂದಿರದಲ್ಲಿ. 
     ಇನ್ನೂ ಇತ್ಯಾದಿ.... ಇತ್ಯಾದಿ.... (ಎಲ್ಲಾ ಹೆಸರಿಸಲು ಸಾಧ್ಯವಾಗುತ್ತಿಲ್ಲ)

ಕವನಗಳು
1) ಜೇಡನ ಬಲೆ 
2) ಸಿಗಲಾರದವಳು 
3) ದೆವ್ವ ಅಂತೆ ದೆವ್ವ 
4) ತಲೆಗಳು 
5) ಮುಗ್ಧರು 
6) ಇಷ್ಟವಿಲ್ಲ 
7) ಬರಿಯ ಜಲವಲ್ಲ 
8) ಕನ್ನಡ ತಾಯಿ. 
9) ವ್ಯಾಕರಣ 
10)
   ಇತ್ಯಾದಿ...... ಇತ್ಯಾದಿ....

ಲಲಿತ ಪ್ರಭಂದಗಳು 
1) ಬದನೆ ಕಾಯಿ ಪುರಾಣ 
2) ಕನಸುಗಳು 
3) ಬಸ್ಸು 
4) ಹೆಲ್ಮೆಟ್ ಪುರಾಣ 
5) ಹುರುಳಿಯ ಪುರಾಣ 
5) ನಮ್ಮೂರು
   ಇತ್ಯಾದಿ.....

ಕಾದಂಬರಿಗಳು.

1) ಪ್ರೇತಾತ್ಮದ ಮನೆಯಲ್ಲಿ
2) ಅಂತ... ಆತಂಕ

ಪ್ರಶಸ್ತಿಗಳು

1) ಕನ್ನಡ ಸಂಘಟನಾ ಶಿಕ್ಷಕ ಪ್ರಶಸ್ತಿ (ಸಿರಿಗನ್ನಡ ಪ್ರಕಾಶನ ಚಿತ್ರದುರ್ಗ)
2) ಕನ್ನಡ ರತ್ನ ಪ್ರಶಸ್ತಿ ( ಸಿರಿಗನ್ನಡ ಪ್ರಕಾಶನ)
3) ಉತ್ತಮ ಶಿಕ್ಷಕ (ರಾಯನ್ ಸಂಸ್ಥೆ 2011- ಶಿಕ್ಷಕ ದಿನಾಚರಣೆಯಲ್ಲಿ)
4) 3 K (ಕನ್ನಡ ಕಥನ ಕವನ) ಸಂಘಟನೆಯಿಂದ ಉತ್ತಮ ಕವನ ವಾಚನಕ್ಕಾಗಿ ಪ್ರಶಸ್ತಿ

ಇತರೆ...

1) 2012 ರಲ್ಲಿ ಔರಂಗಾಬಾದ್ (ಮಹಾರಾಷ್ಟ್ರ) ಸೋಶಿಯಲ್ ಸರ್ವೀಸ್ ಕ್ಯಾಂಪ್ ನಲ್ಲಿ ಭಾಗವಹಿಸುವಿಕೆ)
2) 2014 ರಲ್ಲಿ ಮತ್ತೆ ಔರಂಗಾಬಾದ್ ನಲ್ಲಿ ನಡೆದ ಸೋಶಿಯಲ್ ಸರ್ವಿಸ್ ಕ್ಯಾಂಪ್ ನಲ್ಲಿ ಭಾಗವಹಿಸುವಿಕೆ
3) 2016 ರಲ್ಲಿ  ದಮನ್ (ಕೇಂದ್ರಾಡಳಿತ ಪ್ರದೇಶ... ಸೌತ್ ಗುಜರಾತ್) ನಲ್ಲಿ ನಡೆದ ಸೋಶಿಯಲ್ ಸರ್ವೀಸ್ ಕ್ಯಾಂಪ್ ನಲ್ಲಿ ಭಾಗವಹಿಸುವಿಕೆ

Tuesday, 4 July 2017

ನಮ್ಮ ಬಸ್ಯ..

ನಮ್ಮ ಬಸ್ಯ...

ಮಾಲ್ ನಲಿ ಬಸ್ಯ ಕೆಲಸಕೆ ಸೇರಿ
ಪಿಳಿ ಪಿಳಿ ಕಣ್ಣಲಿ ಜನಗಳ ನೋಡುತ
ಟೈಯನು ಬಿಗಿದು ನೇಣಿನ ಹಾಗೆ
ಸಲಾಮು ಮನಸ್ಕಾರ ಭಂಗಿಯ ತೋರಿ
ಕಷ್ಟದಿ ಕೃತಕ ನಗೆಯನು ಬೀರಿದ್ದ...

ಕೊರಳಲಿ ಐಡಿ ಕಾರ್ಡಿನ ಮಾಲೆ
ನಾಲಿಗೆಯಲಿ ಇಂಗ್ಲಿಷಿನ ಉರುಳುಯ್ಯಾಲೆ
ಹೊಂದದ ವಿಲಾಸಿ ವೇಷವ ತೋರುತ
ಇಲ್ಲದ ಧೂಳನು ಕೊಡವುತ ಒರೆಸುತ
ಮಾಲ್ ನಲಿ ಕೆಲಸವ ಮಾಡಿಹನು...

ಗೆಳೆಯನೊಬ್ಬ ಬಸ್ಯನ ಕಂಡು
ಅಚ್ಚರಿಯಲಿ ಅವನವತಾರವ ನೋಡಿ
'ಶೆಟ್ಟರಂಗಡಿಯಲಿ ಕೆಲಸದಿ ಇರುವಾಗ
ನೀನಿಂಗಿರಲಿಲ್ಲ ಬಿಡೋ ಬಸ್ಯ'
ಹೇಳಿದನು ಹಲ್ಲನು ಕಿಸಿಯುತಲಿ..

ಬಸ್ಯ ಗಂಭೀರದಿ ಗೆಳೆಯನ ನೋಡುತ
ಆಂಗ್ಲ ನುಡಿಯನು ಸ್ಟೈಲಲಿ ನುಡಿಯುತ
'Now India changed ಯಾರ್'
ಕೆಮ್ಮಿದ ತೊದಲಿದ ಹೇಳುತ ಬಸ್ಯ
ಕೊರಳಿನ ಟೈ ಯನು ಸವರುತಲಿ...

   - ಪ್ರಕಾಶ್ ಎನ್ ಜಿಂಗಾಡೆ.

Wednesday, 28 June 2017

ಭಿಕ್ಷುಕಿ

ಭಿಕ್ಷುಕಿ

ಇರಲಿ ಬಿಡಿ
ಆದರೂ ಅವಳು ಸುಂದರಿಯೇ..

ರಸ್ತೆ ಅಂಚಿನಲಿ
ಚಿಂದಿ ದಿರಿಸಿನಲಿ
ಮಸಿ ಮುಖದಲೇ ತಿರುಗುತ
ತಿರುಪೆಯ ಬೇಡುತ
ತರುಣಿಯು ಅಂದವ ತೋರಿಹಳು..

ಇರಲಿ ಬಿಡಿ
ಆದರೂ ಅವಳು ಅಪ್ಸರೆಯೇ..

ಕ್ರೀಮಿಲ್ಲ ಚೆಂದದ ಸೋಪಿಲ್ಲ
ಕಲಾವಿದನ ಮಾಂತ್ರಿಕ ಸ್ಪರ್ಶವಿಲ್ಲ
ರವಿಯ ಹೊಂಬೆಳಕಿನಡಿಯಲಿ
ಬಿಸಿಲಲಿ.. ಮಣ್ಣ ಹುಡಿಯಲಿ
ನಿಜ ಸ್ವರೂಪಿ ಕನ್ಯೆಯಿವಳು..

ಇರಲಿ ಬಿಡಿ
ಆದರೂ ಅವಳು ಸುಸಂಸ್ಕೃತಳು..

ಅತಿಯಾದ ಆಸೆಗಳಿಲ್ಲ
ಮೋಸ ದ್ರೋಹವ ತೋರಿಸಿಲ್ಲ
ಯಾವ ಜನುಮದ ಪಾಪವೋ
ಯಾವ ದೇವರ ಶಾಪವೋ
ಎಲ್ಲರಂತೆ ಬದುಕುವುದ ಕಲಿತಿಲ್ಲ...

    -ಪ್ರಕಾಶ್ ಎನ್ ಜಿಂಗಾಡೆ


ಫ್ಯಾಷನ್ನು

ಫ್ಯಾಷನ್ನು...

ಕೊರಳಲ್ಲಿಯ ಗುಂಡಿ ಬಿಚ್ಚಿದ ಅಂಗಿ
ಸೊಂಟದ ಮೇಲೆ ನಿಲ್ಲದ ಪ್ಯಾಂಟು
ವಕ್ರ ನಡೆಯ ಮರ್ಕಟ ಭಾವ
ಕಿವಿಗಳಲಿ ಕರ್ಣ ಮಂಡಲವು
ಇಂದಿನ ಯುವಕರ ಫ್ಯಾಷನ್ನು..

ಪ್ರಾಣಿಗಳ ಮೀರಿಸುವ ಕೇಶ ವಿನ್ಯಾಸಗಳು
ಅಲ್ಲಲ್ಲಿ ಕತ್ತರಿ ಹಾಕಿದ ಗುರುತುಗಳು
ಇಲಿ ತುರಿದಂತಿರುವ ಕುರುಹುಗಳು
ಇಳಿ ಬಿದ್ದ ಕೂದಲಲಿ ವಿಚಿತ್ರ ರಂಗುಗಳು
ಅದೇನಂತ ಅವರಿಗೇ ಕನ್ ಫ್ಯೂಸನ್ನು..

ಸುಪನಾತಿ ಉಡುಗೆಯ ಹುಡುಗಿಯರು
ಪಾರದರ್ಶಕ ಮಿತ ಉಡುಪುಗಳು
ಕಾಣುವ ಮಂಡಿ ತೋರುವ ನಡು
ಬಣ್ಣ ಮೆತ್ತಿದ ಅಧರಗಳು ಪಾರ್ಲರಿನ ಕೆನ್ನೆಗಳು
ಆದರೂ ಬೇಕೆನ್ನುತಿಹರು ತಮಗೆ ಪ್ರೊಟೆಕ್ಷನ್ನು..

ಐಲು ಬೈಲು ಇಂಗ್ಲಿಷನು ಬೆರೆಸಿ
ಅನ್ಯರ ಅನುಕರಣೆ ಅತಿಯಾಗಿ ನಡೆಸಿ
ನುಡಿ ಸಂಸ್ಕೃತಿಯನು ಹಾಳುಗೆಡಹಿ
ಕನ್ನಡ ಮಾತೆಯ ನುಡಿಯಲಿ ಸೋಲಿಸಿ
ಕೊಡುತಿಹರು ನಾಡಿಗೆ ಅತಿಯಾದ ಟೆಂಕ್ಷನ್ನು..

ಪ್ರಕಾಶ್ ಎನ್ ಜಿಂಗಾಡೆ

Wednesday, 24 May 2017

ಉವಾಚ (ಕವನ)

ಸಂತನ ಹುಡುಕುವುದೇಕಯ್ಯ
ಸಾದುವ ಕಾಣುವ ಹಂಬಲವೇಕಯ್ಯ
ಸಜ್ಜನರ ಸಲಹೆಯು ಯಾತಕೆ ಅಯ್ಯ..?
ಆತ್ಮ ಶುದ್ಧಿಯ ಹೊರತು
ಸುಕಾರ್ಯ ಮಾಡದ ಹೊರತು
ಮರಕ್ಕೆ ಗಾಳಿ ನೀರು ಬೆಳಕು ಎಷ್ಟಿದ್ದರೇನಯ್ಯ
ಕೊಳೆತ ಬೇರು ಇದ ಪಡೆವುದೇ ಅಯ್ಯ